Málið tengist vangoldnum greiðslum sem Morten telur sig eiga inni frá tíma sínum hjá FH 2019-2021. FH var á því að samningur leikmannsins hafi verið verktakasamningur en ekki launþegasamningur. Þar sem um launþegasamning var að ræða skuldaði FH lífeyrissjóðsgreiðslur, skatta og fleira. Davíð segir í sjónvarpsþættinum 433.is að eftir að ljóst var að FH tapaði málinu hafi félagið staðist allar greiðslur á réttum tíma.
„Af því þetta var launþegasamningur þurftum við að útbúa launaseðla, greiða hærri staðgreiðslu af skatti og við þurftum að borga í lífeyrissjóðina. Við gerðum þetta og skatturinn samþykkti það sem og lífeyrissjóðurinn. Villi er mikið búinn að tala um að við séum bara búnir að ákveðna upphæð en þetta er allt á áætlun. Við erum búnir að greiða stærstan hluta af lífeyrisgreiðslunum og klárum staðgreiðslu skatta á næstu tíu mánuðum. Þannig allt tal um að við skuldum honum einhvern pening, ég er bara algjörlega ósammála því,“ segir Davíð í þættinum.
Vilhjálmur fór mikinn í viðtali við Dr. Football í sumar og í síðasta mánuði fór hann með málið til CAS, alþjóðlega íþróttadómstólsins.
„FH skuldaði og skuldar Morten enn allan skatt vegna Mortens, félagið skuldar allar lífeyrissjóðsgreiðslur vegna Mortens fyrir utan 1/6. FH skuldar Morten enn greiðslu vegna feðraorlofs Mortens sem eru í kringum 2,5 milljónir, plús dráttarvexti og orlof miðað við það að samningurinn er launþegasamningur, plús félagsgjald og svona mætti lengi áfram telja,“ sagði Vilhjálmur meðal annars í viðtalinu í sumar.
Davíð botnar lítið í kröfum Vilhjálms og Mortens fyrst FH hefur staðist allar greiðslur.
„Hann vill líka meina að við skuldum honum (Morten) feðraorlof. Ég hef aldrei vitað um að neitt fyrirtæki borgi feðraorlofið, það kemur bara frá ríkinu. Það eru punktar í þessu sem fara ekki alveg heim og saman en við erum allavega búnir að standa okkar plikt. Þetta kennir manni að vanda sig við samningagerð og hafa alla svona hluti á hreinu.
Ég skil það ekki alveg (að farið sé með málið til CAS), ég skil ekki hvað þú ætlar að fá út úr þessu. Þið farið af stað með mál þar sem þið eruð ósáttir við hvernig við gerðum samninginn upp, þið vinnir málið, við ákváðum að una niðurstöðunni en svo er þetta áfram rekið fyrir dómstólum. Persónulega átta ég mig ekki á því.“
Davíð segir að það að hafa tapað málinu sé vissulega fjárhagslegt högg fyrir FH en alls ekki óyfirstíganlegt.
„Þetta hefur auðvitað áhrif. Þetta er tveggja ára samningur. En svona virka bara hlutirnir, þú ert með einhverjar áætlanir og oftast ganga þær ekki upp. Og í þetta skiptið gengu þær ekki upp. En við tökumst bara á við það. Þetta er högg en þetta er ekkert sem rotar okkur,“ segir Davíð Þór Viðarsson að endingu um málið.
Þátturinn í heild er í spilaranum, en hann er einnig aðgengilegur í hlaðvarpsformi á helstu veitum undir „433.is.“
