Samningur Kylian Mbappe við Paris Saint-Germain rennur út næsta sumar og er honum frjálst að ræða við önnur félög í janúar um hugsanleg skipti á frjálsri sölu sumarið 2024.

Framtíð kappans er í lausu lofti en hann hefur sterklega verið orðaður við Real Madrid og er talið að á endanum vilji hann halda þangað.

Mbappe átti í stríði við PSG í sumar og var settur í frystinn en eftir algjöra U-beygju kom hann aftur inn í liðið. Talið er að hann hafi lofað Parísarliðinu að fara ekki þaðan frítt.

Þrátt fyrir þetta er hann áfram orðaður burt og samkvæmt óvæntum fréttum Gazzetta dello Sport á Ítalíu hafa Liverpool og Chelsea áhuga á að fá kappann á frjálsri sölu.

Gætu þau boðið honum flottan samning þar sem ekkert þyrfti að borga fyrir hann.

Þetta verður þó að teljast ólíklegt en Real Madrid er áfram líklegasti áfangastaður Mbappe eftir dvölina hjá PSG.