Íslenska karlalandsliðið mætir Lúxemborg á föstudag hér heima í undankeppni EM 2024. Arnór Ingvi Traustason landsliðsmaður segir að liðið ætli að hefna fyrir ófarirnar úti í Lúxemborg í síðasta mánuði.

Leikurinn gegn Lúxemborg er sá fyrri í þessum landsleikjaglugga en sá seinni er gegn Liechtenstein á mánudag. Ísland þarf nauðsynlega á sex stigum að halda úr þessum leikjum ef liðið ætlar að eiga einhvern möguleika á að fara á EM í gegnum undanriðilinn.

Ísland tapaði 3-1 gegn Lúxemborg í síðasta mánuði og átti vægast sagt dapran leik.

„Við eigum harma að hefna eftir síðasta leik á móti þeim og ætlum okkur þrjú stig. Við ætlum að sýna að leikurinn úti hafi bara verið smá slys,“ segir Arnór við 433.is.

„Það væri bara vitleysa að fara ekki inn í þennan leik með það hugarfar.“

Arnór segir að leikmenn íslenska liðsins séu í góðum gír og brattir fyrir komandi verkefni.

„Það er alltaf góður andi í landsliðnu og gaman að koma í landsliðið.“

Eins og glöggir hafa tekið eftir er veðrið hér á Íslandi ekki með besta móti í dag. Arnór var spurður út í hvernig það hafi verið að æfa í Laugardalnum í dag.

„Það var öðruvísi en smá frískandi að fá vind í andlitið. Maður er vel veðurbarinn.“

Ítarlega er rætt við Arnór í spilaranum.