Bjarni Benediktsson, fjármálaráðherra og formaður Sjálfstæðisflokksins, kom í Íþróttavikuna með Benna Bó sem sýnd er á Hringbraut á föstudagskvöldum. Gestur með honum var sjálfur Hjörvar Hafliðason, doktor Football.
Benedikt Bóas þáttastjórnandi spurði Bjarna hvort hann næði að fylgjast vel með íþróttum sökum anna?
„Þetta er áhugamál og ég fylgist vel með Stjörnunni. Ég hef ekki verið svo öflugur að mæta á alla heimaleiki en ég mæti þegar ég get. Svo verð ég að segja það að þegar ég fór að fikta að vera með í Fantasy leik enska boltans þá fer maður að hafa áhuga á leikjum allra liða.
Ég er alinn upp við það að vera stuðningsmaður Manchester United og bræður mínir gerðu það líka. Ég átti treyju þegar ég var lítill.“
Hjörvar og félagar eru með Fantasy leik sem þeir ræða mikið sín á milli í þættinum Doktor Football. „Ég skil nú ekki alveg af hverju mér var ekki boðið, ég næ þessu ekki,“ sagði Bjarni og hló en sem stendur er hann númer 236 á Íslandi.
„Ég myndi halda að Bjarni væri skynsamur leikmaður sem væri ekki að taka neina stóra sénsa. Ég myndi halda að hann væri með tvo Newcastle menn í sínu liði. Markmanninn og einn varnarmann,“ sagði Hjörvar og Bjarni horfði agndofa á doktorinn þylja upp. „Hann er búinn að fletta mér upp,“ sagði Bjarni en Hjörvar neitaði því.
„Ég samþykkti að koma inn í einhverjar deildir í fyrra og var ömurlegur. Ég las ekki reglurnar og var með menn sem voru slasaðir og ég komst mjög illa frá vetrinum í fyrra. En núna las ég reglurnar og mér gengur betur núna.“
Hjörvar spurði þá hvenær hann hefði keypt Erling Braut Haaland. „Ég var alveg sannfærður og setti hann strax sem fyrirliða. Hann er búinn að moka inn stigum fyrir mig eins og aðra.“
Hjörvar sagði að Kieran Trippier væri að sjálfsögðu í sínu liði. „Ég er alltaf með Harry Kane því ég hef trú á honum. Ég spila alltaf ódýrt í markinu. Það hefur verið mín taktík svo er ég með Almiron. Hann hefur verið að tikka vel inn og það er ekkert sem gleður Fantasy spilara meira en þegar ódýrir leikmenn skila inn mörgum stigum.“
Bjarni sagði að hann hefði gert mistök með því að veðja á Son Heung-min leikmaður Tottenham myndi vera góður í ár. „Ég gafst upp á honum snemma.“
Enski boltinn á 433 er í boði 
