Martin Ödegaard, fyrirliði Arsenal, hefur skrifað undir nýjan langtímasamning við liðið, eitthvað sem mun eflaust kæta stuðningsmenn liðsins mjög. Norðmaðurinn skrifaði undir samning til næstu fimm ára og er hann því samningsbundinn liðinu til ársins 2028.

Samningurinn þýðir að fyrirliðinn verður launahæsti leikmaður liðsins og mun þéna 300 þúsund pund á viku, andvirði 50 milljón króna.

Í yfirlýsingu frá Arsenal vegna tíðindanna er haft eftir Ödegaard að um auðvelda ákvörðun hafi verið að ræða enda líði honum afar vel í herbúðum klúbbsins. Lýsti fyrirliðinn því yfir að hann hygðist vinna titla með liðinu en Arsenal-menn hafa farið vel af stað á nýju tímabili.

Ödegaard hefur sjálfur spilað glimrandi vel en undrabarnið fyrrverandi hefur hjá Arsenal náð að skipa sér í hóp fremstu leikmanna heims eftir að margir voru farnir að óttast að hann næði ekki þeim hæðum sem við var búist. Þannig var hann í hópi þeirra 30 leikmanna sem tilnefndir hafa verið til Ballon d´Or verðlaunanna eftirsóttu.