Kærasta Neymar, Bruna Biancardi, hefur tjáð sig eftir að hann sást með tveimur stelpum á næturklúbbi nýlega. Er hann sakaður um framhjáhald.

Neymar og Bruna hafa verið saman síðan 2021 og er hún nú ólétt af dóttur þeirra. Hún er gengin átta mánuði.

Enskir miðlar fjalla um það að Neymar sé sakaður um að hafa haldið framhjá henni eftir að myndbönd birtust af honum djamma með tveimur stelpum á næturklúbbi á Spáni.

„Ég veit af því sem gerðist og eins og áður er ég mjög vonsvikin,“ segir Bruna en þetta er ekki í fyrsta sinn sem Neymar er sakaður um að halda framhjá henni.

„En ég er á lokastigum óléttunnar og einbeiting mín fer öll á dóttur mína. Ég þakka ykkur fyrir öll skilaboðin.“

Neymar er í dag leikmaður Al Hilal í Sádi-Arabíu en hann fór þangað frá Paris Saint-Germain í sumar.