Alfreð Finnbogason landsliðsmaður var skiljanlega svekktur eftir 3-1 tap gegn Lúxemborg í undankeppni EM 2024 í kvöld.

Ísland þurfti sigur í leiknum og er vonin um að fara á EM í gegnum undankeppnina nú ansi veik.

„Manni líður auðvitað hræðilega eftir svona leik. Við ætluðum að stimpla okkur aftur inn í riðilinn í kvöld,“ sagði Alfreð við Stöð 2 Sport eftir leik.

„Þeir refsuðu okkur illa í kvöld og áttu skilið að vinna.“

Alfreð segir að mistök hafi orðið íslenska liðinu að falli.

„Mér fannst þeir ekki skapa mikið úr opnum leik. Þetta er einn langur bolti og þeir fá víti. Það má auðvitað ekki gerast á þessu leveli.

Við fáum okkar færi til að koma okkur inn í leikinn og eigum að gera betur. Mómentumið er að koma með okkur en þá skora þeir 2-0. Mér fannst við samt ekki gefast upp manni færri.“