Ensk blöð fjalla í dag um þá staðreynd að Gylfi Þór Sigurðsson sé nálægt því að ganga í raðir Lyngby, sem leikur í dönsku úrvalsdeildinni. Daily Mail og fleiri stórir miðlar eru þar á meðal.
Fótbolti.net sagði frá því í gær að Gylfi væri mættur til Kaupmannahafnar til að ræða við félagið.
Freyr Alexandersson er þjálfari Lyngby en með liðinu leika Sævar Atli Magnússon, Kolbeinn Birgir Finnsson og Andri Lucas Guðjohnsen.
Gylfi sem fagnar brátt 34 ára afmæli sínu hefur ekki spilað fótbolta í tvö ár vegna rannsóknar lögreglunnar í Bretlandi á meintu broti hans, var málið fellt niður vegna þess að engar líkur þóttu taldar á að Gylfi yrði sakfelldur.
Enskir miðlar hafa mikinn áhuga á málefnum Gylfa en þeim er þó meinað að fjalla um rannsókn lögreglu sem átti sér stað. Gylfi hafði æft með Val hér á landi í sumar en virðist nú færast nær danska félaginu.
Gylfi hafði átt í viðræðum við DC United í Bandaríkjunum fyrr í sumar en þær viðræður fóru ekki lengra.
Gylfi Þór lék síðast knattspyrnu með Everton um mitt árið 2021 en síðan þá hefur hann ekki spilað fótbolta, endurkoma hans á völlinn virðist þó nálgast.
