Harry Kane, framherji Bayern Munchen, útilokar það ekki að bæta markametið í ensku úrvalsdeildinni.

Kane skrifaði undir hjá Bayern nýlega en hann er 47 mörkum frá því að bæta markamet ensku deildarinnar. Aðeins Alan Shearer er á undan enska landsliðsfyrirliðanum.

Kane getur augljóslega ekki bætt metið sem leikmaður Bayern en hann er aðeins þrítugur og útilokar ekki að snúa aftur til Englands eftir langa dvöl hjá Tottenham.

,,Auðvitað var það alltaf erfið ákvörðun að yfirgefa Tottenham. Ég var þarna í 19 ár og allir hjá félaginu eru tengdir mér,“ sagði Kane.

,,Ég er hins vegar atvinnumaður og hef alltaf viljað gera mitt allra besta og ég taldi þetta rétta tímann. Ég þarf að spila í hæsta gæðaflokki og spila í Meistaradeildinni og elta titla á hverju einasta tímabili.“

,,Þegar ég hugsaði um þetta og Bayern hafði samband þá var þetta ákvörðunin sem ég vildi taka. Fólk talar um met og þessháttar, það talar um Shearer en það er nóg eftir af mínum ferli.“