Það er útlit fyrir að Mason Greenwood muni snúa aftur í lið Manchester United þó félagið hafi ekki tilkynnt um það formlega.

Greenwood hefur ekki æft eða spilað með United í átján mánuði eftir að unnusta hans sakaði hann um nauðgun og ofbeldi í nánu sambandi. Málið var fellt niður fyrr á þessu ári og hefur Manchester United síðan skoðað málið hjá sér.

Richard Arnold, stjórnarformaður United, ætlaði sér að taka upp myndband þar sem hann útskýrði fyrir stuðningsmönnum og leikmönnum félagsins að Greenwood væri að snúa aftur.

Félagið ætlaði sér að kynna þetta 4. ágúst en hefur nú seinkað þessu og segir í umfjöllun Athletic að félagið vilji kynna málið betur fyrir styrktaraðilum og helstu hluthöfum. Félagið vill einnig kynna málið betur fyrir kvennaliði félagsins en lykilmenn í liðinu eru að taka þátt í Heimsmeistaramótinu.

Eftir að fréttir þess efnis að United myndi ráðfæra sig við leikmenn kvennaliðsins hafa þær orðið fyrir áreiti á samfélagsmiðlum. Einhverjir stuðningsmenn, sem vilja greinilega sjá Greenwood snúa aftur, hafa gengið svo langt að hóta leikmönnum kvennaliðsins af ótta við að þær hafi áhrif á endurkomu Greenwood.