Benjamin Mendy fyrrum leikmaður Manchester City situr þessa dagana í réttarsal þar sem tvö mál gegn honum eru tekin fyrir.

Um er að ræða mál sem er verið að taka fyrir aftur. Fjöldi ákæra voru lagðar fram gegn Mendy en hann var sýknaður í sjö ákærum þar sem hann var sakaður um að hafa nauðgað konum.

Kviðdómur gat hins vegar ekki kveðið upp dóm sinn í tveimur ákærum þar sem Mendy er sakaður um nauðgun og kynferðislegt ofbeldi.

Málið er því aftur tekið fyrir og konurnar tvær komu fyrir dómara í dag þar sem þær lýstu upplifun sinni. Önnur konan segir Mendy hafa nauðgað sér á heimil hans árið 2022.

Konunni var boðið á heimili Mendy þar sem hann tók af henni símann, segir lögmaður Mendy að það hafi verið gert svo ekki yrðu teknar myndir á heimili hans.

„Ef þú tekur af þér fötin þá færðu símann þinn, ég vil bara sjá þig. Ég snerti þig ekki, ég vil sjá líkama þinn, ég vil sjá brjóstin þín, brjóstin þín eru svo stór,“ á Mendy að hafa sagt við konuna.

Konan segir að Mendy hafi svo nauðgað sér á meðan hún reyndi að komast undan og sagði honum ítrekað að hætta. Segir konan að Mendy hafi sagt við sig að hún væri alltof feimin og að hann hefði sofið hjá 10 þúsund konum.

Önnur konan segist hafa verið í sturtu á heimili Mendy þegar hann mætti inn á baðherbergið. Hún segist hafa reynt að komast út.

Konan segir að Mendy hafi reynt að nauðga sér en ekki tekist ætlunarverk sitt. Málið heldur áfram fyrir dómi næstu daga og er líklegt að dómur verði kveðinn upp í næstu viku.