Íþróttavikan kemur út alla föstudaga á 433.is, Hringbraut.is og í Sjónvarpi Símans. Helgi Fannar Sigurðsson og Hrafnkell Freyr Ágústsson fá þar til sín góða gesti. Í þetta sinn sat landsliðsmaðurinn Jóhann Berg Guðmundsson með þeim.

Arnar Þór Viðarsson var látinn fara sem landsliðsþjálfari í vor og Age Hareide er tekinn við. Jóhann var spurður út í tíð Arnars með landsliðinu.

„Hann var upp og niður en ég og Arnar náðum vel saman. Ég hafði samband við hann eftir að hann fór og við ræddum vel saman. Ég hef ekkert neikvætt um hann að segja.

Hann kom inn á gríðarlega erfiðum tíma. Hann var látinn svara spurningum á fréttamannafundum sem höfðu ekkert með hann að gera og aðrir hefðu átt að svara. Það var erfitt fyrir hann og þá var þetta brekka upp frá því, eitthvað sem hann náði ekki að vinna sig upp úr.“

En fannst Jóhanni Arnar settur í erfiða stöðu?

„Já. Ég held að enginn þjálfari hefði viljað vera í þessari stöðu og hann var ekki með mestu reynsluna til að takast á við þetta allt saman. Ég held að enginn þjálfari hefði getað komið vel út úr þeim aðstæðum sem hann var settur í.“

Umræðan í heild er í spilaranum.