Tveir leikir fóru fram í Bestu deild karla í kvöld.

Í Kórnum tók HK á móti Víkingi. Gestirnir voru sterkari aðilinn í fyrri hálfleik og leiddu eftir hann. Markið gerði Viktor Örlygur Andrason eftir um hálftíma.

Á 74. mínútu tvöfölduðu Víkingar forystu sína. Þar var að verki Nikolaj Hansen með skallamark.

Skömmu síðar urðu lærisveinar Arnars Gunnlaugssonar hins vegar manni færri eftir ljóta tæklingu Karls Friðleifs Gunnarssonar á Eyþóri Wöhler.

Eyþór var svo aftur í sviðsljósinu þegar um fimm mínútur lifðu leiks þegar hann minnkaði muninn fyrir HK.

Heimamenn reyndu að finna jöfnunarmark en allt kom fyrir ekki. Víkingur sigldi 1-2 sigri í hús í Kópavoginum.

Víkingur er enn með fullt hús stiga, 24 talsins, á toppi deildarinnar eftir átta umferðir. HK er í fjórða sæti með 13 stig.

Á sama tíma tók Valur á móti Keflavík að Hlíðarenda.

Þar varð niðurstaðan afar óvænt markalaust jafntefli. Gestirnir lokuðu ansi vel á heimamenn sem fengu þó góð færi þegar leið á leikinn.

Afar svekkjandi niðurstaða fyrir Val, en Keflavík hefur verið í vandræðum undanfarið.

Valur er í öðru sæti deildarinnar með 19 stig. Keflavík er í því ellefta með 5 stig.