Íþróttavikan er komin á fulla ferð á 433.is og í Sjónvarpi Símans. Helgi Fannar Sigurðsson og Hrafnkell Freyr Ágústsson sjá um þáttinn og fá þeir til sín góða gesti alla föstudaga. Í þetta skiptið voru þeir Andri Geir Gunnarsson og Vilhjálmur Freyr Hallsson úr hlaðvarpinu Steve Dagskrá gestir.

Það fór ekki framhjá neinum að Stjarnan lét Ágúst Gylfason fara sem þjálfara karlaliðsins á dögunum. Aðstoðarmaður hans, Jökull Elísabetarson, er tekinn við.

„Ég styð það sem Stjarnan gerði af því við erum með aðstoðarþjálfara sem hefur stýrt miklu. Gústi er með honum og á klárlega lokaorðið. Núna ertu að færa meiri ábyrgð á Jökul og mér finnst það bara flott,“ segir Hrafnkell um stöðu mála.

Stjarnan hefur farið þá leið undanfarið að gefa ungum leikmönnum stórt hlutverk, auk þess þó að kaupa reynslubolta í bland.

„Er hægt að gera þá kröfu að það sé verið að þróa leikmenn og líka vinna titilinn?“ spyr Helgi.

Andri tók til máls. „Nei. Maður finnur til með honum (Ágústi). Hann vildi fá að snúa genginu við. En hvernig á gengið að vera?“

Hrafnkell vill sjá yngri menn fá alfarið traustið í Garðabænum.

„Ég skil ekki verkefnið sem er í gangi þarna. Takiði þetta bara alla leið og spilið ungu strákunum.“

Umræðan í heild er hér að neðan.