Arnór Borg Guðjohnsen skoraði í síðasta leik Víkings R. gegn KR. Þjálfari Víkings, Arnar Gunnlaugsson, bindur miklar vonir við hann.

Þessi 22 ára gamli sóknarmaður skoraði þriðja mark bikarmeistara Víkings með frábærri afgreiðslu í 3-0 sigri á KR í Bestu deildinni. Liðið er með fullt hús stiga á toppi deildarinnar eftir þrjár umferðir.

„Ég hef alltaf sagt að hann hafi ótrúlega hæfileika. Við sáum slúttið hans á móti KR. Það eru greinilega Guðjohnsen gen í honum. Það eru ekki margir sem klára af slíkri yfirvegun,“ segir Arnar í samtali við 433.is í dag.

Arnór, sem er hálfbróðir goðsagnarinnar Eiðs Smára Guðjohnsen, hefur verið óheppinn með meiðsli en er vonandi að koma sterkur til baka núna.

„Við erum búnir að vera þolinmóðir. Hann er búinn að ganga í gegnum mjög dökka daga síðustu tvö ár. Vonandi er þetta að baki og þá kemur hann til baka sem sterkari persóna og leikmaður sem mun koma til með að hjálpa okkur mjög mikið.“

Ítarlega er rætt við Arnar hér að neðan.