Graham Potter, stjóri Chelsea, segist skilja umræðuna um að félagið hafi eytt og miklu á félagaskiptamarkaðnum í janúar.

Chelsea keypti átta leikmenn fyrir vel ríflega 300 milljónir punda í janúar. Menn á borð við Mykhailo Mudryk, fyrir 88 milljónir punda, og Enzo Fernandez, á 107 milljónir punda, mættu til félagsins.

„Ég get skilið að það sé talað um að yfirbjóða en öll félagaskipti eru áhætta,“ segir Potter.

Hann talar vel um Enzo, sem kom til Chelsea frá Benfica á lokadegi félagaskiptagluggans.

„Hann er enn ungur og var að koma til landsins. Ég hef talað við hann. Ég tala ekki mjög góða spænsku og hann ekki mjög góða ensku. Við þurftum því túlk. Þetta kemur samt allt saman,“ segir Potter.

„Þú þarft að aðlagast félaginu. Við munum hjálpa honum með það og persónuleiki hans er á þann veg að ég hef engar áhyggjur af honum.

Þetta er leikmaður með stóran persónuleika. Hann lék á miðjunni í liði Argentínu sem varð heimsmeistari. Kostir hans geta hjálpað í hvaða deild sem er, sem og í Meistaradeildinni.“

Sem fyrr segir skilur Potter umræðuna að vissu leyti.

„Ég get skilið af hverju fólk telur að við séum klikkuð. Ég er ósammála því en ég skil það.

Við reyndum að vera skapandi. Við reyndum að fjárfesta í núinu og framtíðinni. Við erum í þeirri stöðu að við viljum halda áfram að bæta okkur. Það eru markmið félagsins.“