Ísak Bergmann Jóhannesson skoraði sigurmark íslenska landsliðsins í 1-0 sigri í æfingaleik gegn Venesúela. Ísak kom inn á sem varamaður og segir það alltaf markmið sitt að hjálpa landsliðinu sama í hvaða hlutverki það er. Hann segir Aron Einar hafa komið af krafti inn í landsliðið á nýjan leik, Aron sé einn besti landsliðsmaður Íslands í sögunni.
„Ég var mjög peppaður í að koma inn og hjálpa liðinu sama á hvaða hátt það yrði,“ sagði Ísak Bergmann í viðtali við Viaplay eftir leik.
Aron Einar Gunnarsson sneri aftur í íslenska landsliðið eftir rúmleg árs fjarveru. Miðað við orð Ísaks Bergmanns er greinilegt að hann hefur komið inn af miklum krafti í landsliðið á nýjan leik.
„Aron Einar er geggjaður, maður leiksins finnst mér. Hann hefur verið í burtu í þó nokkurn tíma en sýnir bara að hann er einn besti landsliðsmaður í sögunni. Hann er ótrúlega mikilvægur fyrir okkur. Bæði á hótelinu, æfingum og svo í leikjum. Hann er rosalegur.“
Næsti leikur íslenska landsliðsins er á útivelli gegn Albaníu í Þjóðadeild UEFA á þriðjudaginn næstkomandi.
„Fínt og gaman að vinna núna en þessi gluggi snerist alltaf um leikinn gegn Albaníu og þannig verður það áfram. Við reynum að vinna þá og spila sem bestan fótbolta,“ sagði Ísak Bergmann eftir leik Íslands og Venesúela í kvöld.