Sean Dyche, fyrrum knattspyrnustjóri Burnley, segir algjörlega rangt að hann hafi haft eitthvað á móti því að fá erlenda leikmenn til félagsins.

Dyche var stjóri Burnley í tíu ár en var látinn fara í vor eftir slæmt gengi. Liðið féll í kjölfarið niður í B-deildina.

Burnley var oft það lið í ensku úrvalsdeildinni með flesta enska leikmenn. Dyche hafði þó ekkert á móti því að fá inn erlenda leikmenn.

„Það er gjarnan einhver misskilningur í gangi með svona hluti,“ segir Dyche við Sportbible.

Dyche segir að stjórnin hafi lengi vel ekki sett mikla áherslu á að fá inn erlenda leikmenn. Svo kom hins vegar inn ný stjórn sem horfði meira út fyrir England.

„Það er algjört bull að mér hafi ekki líkað við erlenda leikmenn. Auðvitað elska ég erlenda leikmenn. Af hverju myndir þú ekki gera það? Þetta eru bara leikmenn. Þú vilt leikmenn sem eru góðir og gera liðið þitt betra,“ segir Dyche.

Jóhann Berg Guðmundsson lék undir stjórn Dyche í sex ár, en Íslendingurinn er enn á mála hjá Burnley.

Enski boltinn á 433 er í boði