Arnar Gunnlaugsson, þjálfari karlaliðs Víkings Reykjavík, skrifaði undir nýjan samning til ársins 2025 í dag.

Fyrri samningur Arnars átti að renna út eftir næstu leiktíð. Það var einhver áhugi í Arnar að utan en honum liggur ekki á að komast þangað.

„Það er bara hluti af þessum leik okkar. Um leið og það gengur vel er alltaf verið að tala um að eitthvað muni gerast og tilboð berast,“ segir Arnar.

„Auðvitað hef ég metnað til að fara út, mér liggur bara ekkert á. Þetta er klúbbur sem býður mér upp á það að berjast um titla, fær unga leikmenn, erum í Evrópu og að standa okkur hrikalega vel núna. Svo það eru ekkert mörg lið sem geta boðið upp á það.“

Einhverjar sögusagnir voru uppi um að Valur hefði áhuga á að sækja Arnar yfir til sín. Það er hins vegar ekkert til í því, að sögn Arnars.

„Það gerðist aldrei. Það eru ýmsar sögusagnir í gangi en það var ekkert íslenskt félagslið sem hafði samband.“

„Þeir eru í toppmálum með vin minn Óla Jó við,“ bætir hann við.

Ítarlegt viðtal við Arnar má nálgast hér að neðan.