Kjartan Henry Finnbogason, framherji KR, hefur fengið ansi lítinn spiltíma í sumar. Hann kom inn á í blálokin í 5-3 tapi gegn Víkingi Reykjavík í 8-liða úrslitum bikarsins.
Það vakti athygli í gær að leikmaðurinn „líkaði við“ færslu þar sem Rúnar Kristinsson, þjálfari KR, var gagnrýndur fyrir að nota Kjartan ekki meira. „Þig vantar mark og geymir Kjartan Henry bara á beknnum þangað til 30 sek eru eftir,“ skrifaði Ásgeir Halldórsson á Twitter. Þessa færslu „líkaði“ Kjartan við.
Spiltími Kjartans var til umræðu í hlaðvarpsþættinum Þungavigtinni í gærkvöldi.
„Hvað er í gangi? Þetta er örugglega þriðja dissið á stuttum tíma,“ sagði Mikael Nikulásson í þættinum.
KR vann öruggan 4-0 sigur á ÍBV á dögunum, þar sem Kjartan kom ekki við sögu. Það þótti Mikael skrýtið.
„Hefði ekki verið skynsamlegra, í staðinn fyrir að gefa einhverjum ungum strákum, sem eiga örugglega aldrei eftir að spila alvöru leik fyrir KR og væntanlega farnir á lán í Leikni eða Fjölni eða Fylki, hefði ekki verið eðlilegra að setja Kjartan Henry inn á í unnum 3-0 leik á móti ÍBV?“ Spurði Mikael.
„Þetta er eitthvað mjög skrýtið. Ég þekki Kjartan Henry ágætlega og ég get ekki ímyndað mér annað en það sjóði á honum.“