Þorsteinn Halldórsson, þjálfari íslenska kvennalandsliðsins, hafði engan grun um að Hallbera Guðný Gísladóttir væri að íhuga að leggja skóna á hilluna, áður en hún tilkynnti það í síðasta mánuði.
Hallbera var með íslenska landsliðinu á lokakeppni Evrópumótsins í síðasta mánuði en tilkynnti svo að hún væri hætt.
„Ég hafði ekki hugmynd,“ sagði Þorsteinn á fréttamannafundi í höfuðstöðvum Knattspyrnusambands Íslands í Laugardal í dag, spurður út í ákvörðun Hallberu.
Ísland á fyrir höndum gífurlega mikilvæga leiki gegn Hvíta-Rússlandi og Hollandi í undankeppni Heimsmeistaramótsins 2023 í næsta mánuði.
Sigri Ísland Hvít-Rússa verður liðið með pálmann í höndunum, á toppi undanriðilsins, fyrir leikinn gegn Hollendingum. Eitt lið fer beint á HM og fer annað sætið í umspil.
„Þetta leggst vel í mig. Ég er bjartsýnn og hef fulla trú á að við gerum það sem til þarf til að komast áfram,“ segir Þorsteinn Halldórsson, þjálfari Íslands, í viðtali við 433.is fyrr í dag.
Hann vill sjá góðan stuðning í heimaleiknum gegn Hvít-Rússum. Leikurinn gegn Hollandi er leikinn ytra.
„Ég vonast til að fólk mæti og styðji við liðið, að allir sem voru að tjá sig um það að það hafi ekki verið spilaður heimaleikur áður en við fórum á EM, að þau mæti allavega núna, geri hlutina almennilega, að fólkið sem er að tjá sig endalaust láti sjá sig á vellinum. Þetta snýst um stuðning, ekki eintómt blaður.“
Ísland tók þátt í lokakeppni EM á dögunum. Liðið gerði jafntefli í öllum leikjum sínum í riðlakeppninni og komst ekki áfram.
„Ég held algjörlega að leikmenn noti þau sárindi sem við upplifðum eftir að hafa ekki komist upp úr riðlinum, það ýti enn meira við okkur í að taka næsta skref,“ segir Þorsteinn Halldórsson, landsliðsþjálfari.