Fjármál Barcelona hafa verið mikið í umræðunni undanfarna mánuði. Félagið er í gríðarlegum fjárhagsvandræðum. Þó hefur því tekist að versla inn stjörnur á borð við Robert Lewandowski, Jules Kound og Raphinha, ásamt fleirum, í sumar.
Börsungar hafa tekið upp á því að selja stóran hluta framtíðartekna sinna til að bjarga félaginu í núverandi mynd. Til að mynda hefur félagið selt 25% af framtíðarsjónvarpstekjum sínum næsta aldarfjórðunginn.
Í Viðskiptablaðinu fer Jóhann Már Helgason, sérfræðingur um fjármál í fótbolta, yfir stöðuna hjá Barcelona. Hann telur að eitthvað verði að breytast í stefnu félagsins.
„Ég held að í framtíðinni muni einhver stíga inn í og stoppa félagið á þeirri vegferð sem það er á, hvort sem það verði UEFA eða FIFA. Það er farið að kroppa svo mikið í framtíðartekjur félagsins og í þeim stofni sem Barcelona á að vera byggt upp á til framtíðar. Þetta er orðinn hættulegur leikur.“
Barcelona er nú í eigu 140 þúsund hluthafa. Jóhann Már telur að það geti breyst. „Félagið á sig núna sjálft og það er ekki einhver einn eigandi. Ég held að það gæti breyst og að félagið endi í einkaeigu hjá einhverjum aðila sem getur tekið skuldirnar yfir.“
Jóhann Már telur að Barcelona hefði átt að selja sína verðmætustu leikmenn frekar en framtíðartekjur. Þannig hefði liðið orðið slakara í nokkur ár en jafnað sig svo. „Laporta getur ekki hugsað sér veikt Barcelona. Félagið fer þá í ýmis klækjabrögð og veðsetur framtíðina til að ná árangri í nútíðinni.“