Það kom upp sérstakt atvik í leik HK og Þróttar Vogum í Lengjudeild karla á dögunum.
Þá meiddist Rafal Stefán Daníelsson, markvörður Þróttar. Þórhallur Ísak Guðmundsson, sem hefur verið varamarkvörður liðsins, var lánaður til ÍH á dögunum. Því þurfti að láta útileikmanninn Hauk Leif Eiríksson í markið.
Þetta gerðist í stöðunni 1-1 en leiknum lauk 4-1 fyrir HK.
„Þetta er náttúrulega bara púra áhugamennska, að vera ekki með varamarkmann á bekknum,“ segir Hrafnkell Freyr Ágústsson í nýjasta markaþætti Lengjudeildarinnar.
Þróttur er í neðsta sæti deildarinnar með sex stig, tólf stigum frá öruggu sæti.
„Ég skil samt báðar hliðar á teningnum. Fyrir mér er Þróttur 99% fallinn. Þeir eru með varamarkmann sem þeir sjá að getur fengið reynslu annars staðar. Þeir taka þennan séns.“
