Kódrengir eru óvænt í níunda sæti Lengjudeildar karla eftir tíu umferðir. Flestir bjuggust við þeim mun ofar í töflunni.

Liðið tapaði 2-1 gegn Aftureldingu í síðustu umferð.

„Þetta eru bara vonbrigði,“ sagði Hörður Snævar Jónsson í markaþætti Lengjudeildarinnar á Hringbraut í gær.

Hrafnkell Freyr Ágústsson, sérfræðingur þáttarins, tók í sama streng. „Það er búið að tala um fína spilamennsku og þeir eru búnir að breyta sínum leik að vissu leyti en úrslitalega séð er þetta bara ekki nægilega gott. Þeir þurfa að finna leiðir til að spila þennan fótbolta sem þeir vilja spila og ná í stig í leiðinni.“

Lengjudeildin er þó jöfn og eru Kórdrengir aðeins fimm stigum frá öðru sæti. „Það er ekki langt á milli, þetta eru tveir, þrír sigurleikir. En ef við horfum á mótið í heild sinni eru þetta vonbrigði. Ég bjóst við að þeir myndu hanga í Fylki og HK,“ sagði Hrafnkell.