Stjarnan og FC Midtjylland hafa komist að samkomulagi um sölu á Daníel Frey Kristjánssyni en Daníel er ungur efnilegur leikmaður félagsins sem hefur staðið sig ákaflega vel bæði með Stjörnunni og yngri landsliðum Íslands.
Daníel er fæddur árið 2005 en hann kom við sögu í einum bikarleik með Stjörnunni á þessu tímabili. Þá lék hann einn leik í efstu deild á síðustu leiktíð.
„Danni er einn af þessum ungu leikmönnum sem fengu fyrst tækifæri í fyrra og voru partur af nýrri stefnu félagsins og þó svo að hann hafi ekki komið mikið við sögu í leikjum meistaraflokks hingað til þá hefur þróun hans sem leikmanns verið hröð og er afar ánægjulegur vitnisburður um það sem við erum að gera í Garðabænum varðandi vinnu með unga leikmenn. Ég vil nota tækifærið og óska Danna til hamingju með þetta skref á hans ferli og við hlökkum til að fylgjast með honum í framtíðinni enda frábær drengur sem á sannarlega framtíðina fyrir sér“ sagði Helgi Hrannarr Jónsson formaður mfl ráðs Stjörnunnar.