Úrslitaleikurinn í Meistaradeildinni var fyrirferðamikill í Íþróttavikunni með Benna Bó sem er á dagskrá Hringbraut á föstudögum. Þar mætast Real Madrid og Liverpool í París. Hjörvar Hafliðason, doktor Football og íþróttastjóri Viaplay og Jóhann Már Helgason, íþróttaskríbent og sérfræðingur í þættinum sátu í settinu með Benedikt Bóas.

Jóhann Már er stuðningsmaður Chelsea og er að skila bikarnum. „Þetta verður geggjaður leikur og fyrir mér hefur Real Madrid verið algerir skemmtikraftar. Sérstaklega í útsláttarkeppninni. Þetta er búið að vera lygilegt hvernig þeir hafa farið áfram. Mér finnst Liverpool sigurstranglegri en mér finnst Real vera þannig að það er ekki hægt að afskrifa þá.“

Jóhann segir að Real hafi oft verið nálægt því að detta út en alltaf hafi liðið fundið leið til að koma til baka. „Þetta er ótrúlega skrýtið fótboltalið,“ segir hann og Hjörvar tekur undir það.

„Liverpool liðið er betra lið en Real og ég skil ekki ennþá hvernig Real fór í gegnum Manchester City því City er með miklu betra lið. En það er ekki hægt að horfa framhjá þessum sigur DNA sem er í liðinu og félaginu. Þeir eru ótrúlegir.

En ég hef séð mjög marga leiki með Real í vetur þar sem þeir hafa ekki verið neitt sérstakir. Barcelona pakkaði þeim saman á heimavelli og það er allt með því að Liverpool vinni þennan leik. Liverpool hefur hungrið í þetta í ár. Liverpool er betra og sú krafa sem ég geri á þennan leik er að ég fái mörk í venjulegum leiktíma. Ég nenni ekki 0-0.“