Heimir Guðjónsson þjálfari Vals hefur ekki áhyggjur af því að verða rekinn úr starfi. Þetta sagði Heimir á RÚV eftir slæmt tap gegn Breiðablik í bikarnum í gær.
Um er að ræða þriðja tap Vals í röð í öllum keppnum en eftir fína byrjun á sumrinu hefur þetta dýrasta lið deildarinnar hikstað hressilega.
„Nei, það er ekkert sem ég hef áhyggjur af, ég er bara ráðinn í vinnu og það eina sem ég er hræddur við í fótbolta er ég sjálfur þannig ég er ekkert að spá í það,“ sagði Heimir.
Heimir fékk mikið traust frá stjórn Vals síðasta haust þegar liðið átti mjög erfitt sumar. Nú reynir á það traust.
„Við vissum það þegar mótið byrjaði að við erum með nýtt lið og þetta gæti tekið einhvern tíma. Reyndar hefur mótlætið verið aðeins meira en við kannski reiknuðum með. Við verðum bara að standa saman og snúa saman bökum og halda áfram. Það er jákvætt fyrir okkur að við erum að fá leikmenn úr meiðslum og það þýðir ekkert að henda inn hvíta handklæðinu,“ bætti Heimir við.