Kristall Máni Ingason leikmaður Víkings fékk eins leiks bann fyrir að kýla Davíð Ingvarsson varnarmann Breiðabliks. Atvikið átti sér stað í leik liðanna á sunnudag.

Margir áttu von á því að Kristall myndi fá tveggja leikja bann en fyrr í sumar fékk Oleksiy Bykov varnarmaður KA tveggja leikja bann fyrir ofbeldisfulla hegðun.

„Því miður ekki í fyrsta skiptið sem það er mismunun í kerfinu og heldur ekki það síðasta,“ skrifar Sævar Pétursson framkvæmdarstjóri KA á Twitter í gær og er greinilega ekki sáttur með kerfið hjá KSÍ og hvernig aganefnd sambandsins vinnur.

Haraldur Haraldsson framkvæmdarstjóri knattspyrnudeildar Víkings er alls ekki á sama máli og Sævar. „Engin mismunun. Var ekki haus í haus og blóðgun hjá þínum manni.“

Bæði atvik áttu sér stað í Bestu deildinni en Sævar ítrekar að hann hafi ekkert viljað sjá Kristal fá lengra bann. „Bara til að hafa hlutina á hreinu þá er ég ekki að kalla eftir aukaleik á þinn mann. Vandamál fótboltans er að dómstóllinn skoðar málin ekki heldur fer alfarið eftir skýrslu domara. Í tilfelli Bykov metur domari það sem ofsalega framkomu og því metur dómstóll það sem aukaleik,“ segir Sævar og útskýrir þar með mál sitt.

Haraldur útskýrir svo hvers vegna Kristall fékk bara einn leik í bann. „Átta mig á því að þú ert ekki að kalla eftir því. Kristall er líka með ofsalega framkomu en eins og ég sagði fyrst þá er það metið mun alvarlegra að fara í höfuð/andlit leikmanns heldur en í skrokk. Það eru reglurnar og því sá Víkingur t.d. enga ástæðu til að skila greinargerð.“

Sævar vill að aganefnd KSÍ skoði málin betur en að fara í einu og öllu eftir skýrslu dómara. „Ég vil sjá að dómstóll geti skoðað málin ekki að einu gögnin sem farið er eftir sé skýrsla domara. Það virðist engu máli skipta þó félög skili inn andsvari eður ei.“