Liverpool og Villarreal mættust í fyrri leik liðanna í undanúrslitum Meistaradeildar Evrópu í kvöld. Leikið var á Anfield.
Liverpool var miklu meira með boltann í fyrri hálfleik og stjórnaði ferðinni. Liðinu tókst hins vegar ekki að opna vörn gestanna og skapa sér almennileg dauðafæri. Markalaust var í leikhléi.
Heimamenn voru áfram mun betri aðilinn í seinni hálfleik og á 53. mínútu komust þeir yfir. Pervis Estupinan setti boltann þá í eigið net eftir fyrirgjöf Mohamed Salah.
Aðeins tveimur mínútum síðar var Liverpool búið að tvöfalda forskot sitt. Sadio Mane skoraði þá eftir undirbúning Salah.
Liverpool var líklegra til að bæta við þriðja markinu en Villarreal að jafna. Meira var þó ekki skorað. Liverpool leiðir 2-0 fyrir seinni leik liðanna á Spáni í næstu viku.