Manchester United hefur sett sig í samband við umboðsmann Cody Gakpo, ef marka má heimildir enska götublaðsins The Sun.

Gakpo var sterklega orðaður við Rauðu djöflanna í sumar en að lokum var landi hans Antony fenginn á Old Trafford frá Ajax.

Nú vill United hins vegar klófesta Gakpo.

Þessa stundina er hinn 23 ára gamli Gakpo staddur á Heimsmeistaramótinu í Katar með hollenska landsliðinu. Hann skoraði í öllum leikjum liðsins í riðlakeppninni og heillaði mikið.

Sóknarmaðurinn er á mála hjá PSV í heimalandinu en líklegt er að hann fari þaðan fljótlega. United hefur helst verið nefnt sem hugsanlegur áfangastaður kappans.

Tölfræði Gakpo í hollensku úrvalsdeildinni er hreint ótrúleg. Hann hefur skorað níu mörk og lagt upp tólf í fjórtán leikjum.