Adam Örn Arnarson, fyrrum leikmaður Breiðabliks er ósáttur með framkomu félagsins í sinn garð. Bakvörðurinn sem er 27 ára gamall ræðir málið við Vísi.

Adam Örn er samningslaus en hann samdi við Breiðablik fyrir tímabilið. Kom hann þá heim úr atvinnumennsku eftir níu ára dvöl.

Adam spilaði lítið sem ekkert hjá Íslandsmeisturum Breiðabliks og fór um mitt sumar á láni til Leiknis.

„Ég fékk SMS frá Ólafi Kristjánssyni, yfirmanni knattspyrnumála hjá Breiðabliki. Hann vildi tala við mig augliti til auglitis en síðan hef ég ekkert heyrt í honum. Það var fyrir mánuði síðan,“ segir Adam við Vísi.

Hann segir að hann og pabbi sinn hafi gert margt fyrir Breiðablik og upplifir framkomuna sem kaldar kveðjur.

„Persónulega finnst mér þetta frekar mikil vonbrigði. Þetta er uppeldisfélagið og mér líður eins og þetta sé létt virðingarleysi. Svo er pabbi í stjórn stuðningsmannaklúbbi Breiðabliks. Við höfum alltaf gert allt fyrir Breiðablik og þetta er mjög skrítin framkoma, finnst mér.“

Adam segist haf rætt við eitt lið í Bestu deildinni en kveðst hissa hversu lítill áhugi sé á sér eftir farsælan feril sem atvinnumaður.