Matthías Vilhjálmsson fyrirliði FH segir ekki á hreinu hvað framtíðin ber í skauti sér. Samningur Matthías við FH er að renna út og hafa félög í deildinni staðfest áhuga á honum.

Ljóst er að FH vill halda í sinn markahæsti mann frá liðnu tímabili, þegar FH var upp við vegg og framtíð félagsins í efstu deild í hættu steig Matthías upp. Hann skoraði þrennu í mikilvægum sigri á Leikni undir lok móts sem hjálpaði FH að halda sér í deildinni.

Tímabilinu lauk á laugardag en það var langt að þessu sinni vegna breytinga á fyrirkomulagi efstu deildar. „Það er gott samtal á milli okkar,“ segir Matthías í samtali við 433.is og á þar við FH.

„Það var lokahóf á laugardaginn og svo fær maður áminningu á samfélagsmiðlum degi síðar að undirbúningstímabilið hafi byrjað fyrir ári síðan. Ég ætla að fá smá tíma og anda aðeins, skoða tímabilið í heild sinni.“

FH sem er sigursælasta lið Íslands í seinni tíð hefur upplifað erfið ár. „Ég er bara að skoða mín mál, það er ekkert leyndarmál að þetta var mjög erfitt tímabil fyrir alla hjá FH, bæði alla félagsmenn og leikmenn. Ég er núna bara á leið í frí með konunni minni og mun hugsa mín mál á næstunni.“

Matthías er 35 ára gamall en eftir níu ár í atvinnumennsku snéri hann heim í FH fyrir tímabilið 2021.

Arnar Gunnlaugsson þjálfari Víkings hefur staðfest áhuga sinn á sóknarmanninum knáa og þá hafa fleiri lið verið nefnd til sögunnar. „Ég ætla ekkert að tjá mig um það við hverja ég hef talað,“ segir Matthías og vill ekkert gefa upp hvaða samtöl eða fundir hann hefur tekið.

„Arnar og ég spiluðum saman í FH og hann þekkir mig eðlilega sem leikmann. Ég hef það bara fyrir sjálfan mig við hverja ég hef átt samtal þangað til ég hef tekið ákvörðun,“ segir Matthías.