Það vakti töluverða athyglui í sumar er Chelsea festi kaup á markmanninum efnilega Gabriel Slonina.
Slonina er aðeins 18 ára gamall en hann spilar með Chicago Fire og mun ekki hitta nýju liðsfélaga sína hjá Chelsea fyrr en í janúar.
Goðsögnin Petr Cech hringdi í Slonina og sannfærði hann um að koma til Chelsea en Real Madrid var talið vera í bílstjórasætinu.
Slonina hélt um tíma að um grín væri að ræða og bjóst aldrei við því að fá símtal frá Cech sem vann fyrir Chelsea á þessum tíma.
,,Vinir mínir sendu mér skjáskot af orðrómunum á netinu og ég var orðaður við bestu félög heims,“ sagði Slonina.
,,Þetta er enn ansi skrítið því Chelsea er eitt besta félag heims og að ég hafi komist á þennan stað er í raun ótrúlegt.“
,,Ég hélt að þetta væri grín þegar Petr Cech hringdi í mig. Ég þurfti að hlusta til að vera viss um að þetta væri hann. Sem betur fer þá skellti ég ekki á.“
,,Ég var svo hrifinn að hann hafi þekkt minn leikstíl. Hann er frábær náungi og það er gott að vera með ameríska eigendur, ég vil sanna að þeir hafi tekið rétta ákvörðun.“
