Maurizio Sarri, knattspyrnustjóri Lazio og fyrrum knattspyrnustjóri Chelsea, slapp heldur betur vel í leik sinna manna gegn Udinese í ítalska bikarnum í gærkvöldi.
Sarri gæti hugsað sig tvisvar um næst þegar að hann stendur nálægt hliðarlínunni er lið hans er að spila en hinn 63 ára gamli knattspyrnustjóri lenti í harkalegu samstuði við leikmann Udinese, Ignacio Pussetto sem er á láni hjá liðinu frá Watford.
Samstuðið var það mikið að gleraugu Sarri, flugu af honum og hann lá kylliflatur eftir í grasinu.
Hann var hins vegar fljótur að standa upp aftur og gaf fljótlega til kynna að það væri allt í góðu hjá sér.
Í viðtali eftir leik sló hann síðan á létta strengi. ,,Þetta var góð prófraun á ástandi mínu, ég vil benda á að það var ég sem stóð fyrstur upp eftir þetta.“
Sjón er söguríkari en myndband af atvikinu má sjá hér fyrir neðan.
Lazio endaði með að bera sigur úr býtum í leiknum og er búið að tryggja sér sæti í 8-liða úrslitum ítalska bikarsins.
Maurizio Sarri lost his glasses but won the match 😂 pic.twitter.com/l3nncemG2t
— CBS Sports Golazo ⚽️ (@CBSSportsGolazo) January 18, 2022