Arsenal færist nær því að krækja í miðjumanninn Arthur Melo frá Juventus. Að sögn Mirror hefur Mikel Arteta sannfært miðjumanninn um hugmyndafræði sína.
Þessi 25 ára gamli leikmaður gæti farið til Arsenal á láni þar sem hann er ekki inni í myndinni hjá Massimiliano Allegri, stjóra Juventus.
Mirror segir að Arthur vilji ganga til liðs við Arsenal sem fyrst.
Til þess að Juventus leyfi Arthur að fara vill félagið þó sækja leikmann á miðjuna í hans stað. Þar er Ruben Loftus-Cheek hjá Chelsea á blaði.
Arthur kom til Evrópu árið 2018. Þá skrifaði hann undir hjá Barcelona eftir að hafa verið keyptur frá Gremio á tæpar 28 milljónir punda.
Eftir tvö fín tímabil á Nývangi fór Arthur til Juventus í skiptum fyrir Miralem Pjanic.
Arsenal er í leit að miðjumanni þar sem Thomas Partey og Mohamed Elneny eru staddir á Afríkumótinu með landsliðum sínum. Þá misstu Emile Smith Rowe og Granit Xhaka af síðasta leik Arsenal. Sá fyrrnefndi var meiddur og hinn með kórónuveiruna. Þá er Ainsley Maitland-Niles genginn í raðir Roma á láni.
