Kalmar FF í sænsku úrvalsdeildinni hefur staðfst að Davíð Kristján Ólafsson hafi skrifað undir samning við félagið.
Þessi öflugi 26 ára gamli bakvörður kemur til félagsins frá Álasundi í Noregi þar sem samningur hans var æá enda. Davíð yfirgaf Breiðablik árið 2019 og hefur spilað í þrjú ár með norska félaginu.
Bakvörðurinn knái er nú staddur í verkefni með A-landsliði karla sem mætir Úganda í æfingaleik í dag.
„Hann getur spilað sem vinstri bakvörður, vinstri kantmaður og á miðjunni,“ segir Jörgen Petersson íþróttastjóri Kalmar.
„Hann er fljótur og góður með boltann, hann er með sjálfstraust í sóknarleiknum og góður varnarmaður.“
Davíð er spenntur fyrir nýrri áskorun á ferlinum. „Það er mjög gott að allt sé klár og ég hlakka til að byrja að æfa og hitta nýja liðsfélaga mína,“ sagði Davíð sem mætir til Kalmar 18 janúar.
„Mér líkar hvernig liðið vill spila fótbolta. Ég lít á sjálfan mig sem sóknarsinnaðan bakvörð með góðan vinstri fót og ég held að mínir eiginleikar muni henta vel hérna. Vonandi getum við haldið áfram að byggja á því sem liðið sýndi í fyrra og gert eitthvað gott saman.“