Brynjólfur Andersen Willumsson mun ekki taka þátt í æfingaleikjum Íslands gegn Suður-Kóreu og Úganda. Liðið er statt í Tyrklandi.
Um er að ræða æfingaleiki en sóknarmaðurinn knái greindist með COVID-19 á hótelinu í Antalya.
„Brynjólfur er með COVID, hann er í einangrun á hótelinu,“ sagði Ómar Smárason fjölmiðlafulltrúi á fréttamannafundi í dag.
„Það var gætt að öllum reglum, hann er í einangrun og ekki útlit fyrir að neinn annar sé smitaður. Það geta allir fengið COVID,“ sagði Ómar.
Brynjólfur er 21 árs gamall framherji sem leikur með Kristiansund BK í Noregi en hann ólst upp hjá Breiðablik.