Samningur Arnars Grétarssonar, þjálfara karlaliðs KA, er að renna út eftir tímabil. Samkvæmt Þungavigtinni hefur honum ekki verið boðinn nýr samningur, þrátt fyrir eftirtektarverðan árangur.

KA er í þriðja sæti Bestu deildarinnar með 40 stig eftir 21 leik, átta stigum á eftir toppliði Breiðabliks. Liðið er ofar en nær allir sérfræðingar spáðu því fyrir tímabil.

KA vann einmitt frækinn 2-1 sigur á Breiðabliki fyrir norðan í gær.

„Að KA-menn séu ekki búnir að reyna að negla Arnar niður fyrir næsta tímabil, það er lögreglumál,“ segir Kristján Óli Sigurðsson í Þungavigtinni.

Kristján segir að önnur félög í deildinni eigi að heyra í Arnari og reyna að semja við hann.

„Ef ég væri liðin í bænum, Stjarnan, HK, Valur, semjið þið við hann.“