Hjörvar Hafliðason segir það mýtu að karlalið Breiðabliks fari alltaf á taugum (e. choke) á lokakafla Íslandsmóts.

Það hefur skapast umræða um það í íslensku knattspyrnusamfélagi undanfarið hvort Breiðablik myndi klikka á að tryggja sér Íslandsmeistaratitilinn á lokakaflanum, en liðið er langefst í deildinni. Margir nota þau rök að það hafi oft gerst áður. Það segir Hjörvar hins vegar alrangt.

„Breiðablik hafði aldrei keppt um neinn Íslandsmeistaratitil fyrr en þeir einhvern veginn duttu á að verða Íslandsmeistarar árið 2010 með 44 stig,“ segir hann í Dr. Football.

„Restin af tíma Ólafs Kristjánssonar (sem þjálfara Breiðabliks), þá áttu þeir ekkert efni á að keppa um Íslandsmeistaratitilinn, höfðu ekkert lið til að keppa um hann. Ekkert choke þar.“

„2015 mætti Arnar Grétarsson og jú, jú, hann setur eitthvað stigamet þarna en voru ekkert í alvöru baráttu.“

Því næst bendir Hjörvar á að þegar Ágúst Gylfason var með Blika hafi liðið þó ekki klúðrað toppsætinu.

„2020 kemur Óskar Hrafn inn, breytir fótboltanum. Í fyrra unnu þeir sjö af síðustu átta. Árni Vill (Vilhjálmsson) klúðrar einhverri vítaspyrnu og Pálmi Rafn klikkaði líka í Vesturbænum,“ segir Hjörvar. Þarna á hann við þegar Breiðablik tapaði 1-0 gegn FH í fyrra, á sama tíma og Víkingur, sem varð Íslandsmeistari, vann dramatískan sigur á KR.

„Fyrir mér er það ekki choke að vinna sjö af síðustu átta. Ef menn eru að tala um eitthvað choke hjá Breiðablik þá veit ég ekki alveg hvert þeir eru að fara. “