Íþróttavikan með Benna Bó á Hringbraut hófst að nýju eftir sumarfrí á föstudaginn. Aron Jóhannsson, leikmaður Vals, og Hörður Snævar Jónsson, íþróttastjóri Torgs sátu í íþróttasetti Hringbrautar í miðbænum og fóru yfir málin. Ræddu meðal annars um íslenska boltann en stórleikur umferðarinnar er viðureign Breiðabliks og Vals.

„Tap þar og þá fara allar hillur að hristast og skjálfa í Kópavogi,“ sagði Hörður.

Aron sagði að orð Erlings Agnarssonar um Breiðablik á dögunum gætu gert þá brjálaða sem væri ekkert endilega frábært fyrir Valsmenn. „Hann hefði alveg mátt bíða með þessi orð fram yfir mánudaginn,“ sagði hann léttur.

„Því miður fyrir okkur erum við ekki búnir að sjá marga off daga hjá Breiðablik í sumar. Það var leiðinlegt fyrir okkur að þeir áttu hann gegn Víkingum. Maður hefði viljað fá þetta á mánudag. En Blikar eru búnir að sýna það í allt sumar að þeir eru besta liðið á landinu og kannski 20-30 mínútur off gera þeir mistök sem Víkingarnir refsa fyrir. Annars fannst mér blikarnir spila sinn bolta í leiknum gegn Víking.

Við erum að fara reyna sækja þrjú stig á mánudag. Það má ekki gleymast að við fengum eina góða rasskellingu þarna fyrr í sumar og eigum harma að hefna.“

Hörður benti á að hinn hlutlausi stuðningsmaður vilji sjá að forskot Blika verði ekki of mikið fyrir úrslitakeppnina en þeir eru níu stigum á undan KA og 10 á undan Víking. Aron segir að öll liðin gætu unnið alla í október, bæði í efri og neðri helming. „Maður vonar að á báðum endum sé spenna. Mér finnst þetta geggjað concept sem er framundan.

Þetta verður vonandi mikið af leikjum sem eru spennandi og fólk komi að horfa.“