Breiðablik og Valur mætast í úrslitaleik Mjólkurbikars kvenna á laugardag. Um sigursælustu lið bikarsins er að ræða, með þrettán titla hvort.

Elísa Viðarsdóttir, fyrirliði Vals, ræddi við 433.is í höfuðstöðvum KSÍ í aðdraganda leiksins í dag.

„Leikurinn leggst vel í mig. Við erum nýlentar úr úr Meistaradeildarævintýri. Það er búinn að vera mikill stígandi í liðinu og við vonum að sá stígandi verði á laugardag,“ segir Elísa, en Valskonur komust í aðra umferð undankeppni Meistaradeildar Evrópu á dögunum.

Elísa býst við skemmtilegum leik. „Það eru alltaf góðir leikir þegar Valur og Breiðablik mætast. Ég held það verði engin undantekning þar á.“

Valur hefur ekki unnið bikarinn síðan 2011. Liðið finnur þó ekki fyrir aukinni pressu vegna þess.

„Það er engin pressa. Við erum búnar að vera að gera vel í deild undanfarin ár. Því miður hefur bikarinn ekki gengið. Við erum hungraðar í að koma með bikarinn heim á Hlíðarenda.“ 

Viðtalið í heild má horfa á hér að neðan.