Valur og Breiðablik hefja leik í undankeppni Meistaradeildar Evrópu á morgun.

Um fyrstu umferð undankeppninnar er að ræða. Það þarf að komast í gegnum tvö stig undankeppninnar til að komast í riðlakeppni Meistaradeildarinnar, sem samanstendur af sextán liðum og hefst í október.

Undankeppnin gengur þannig fyrir sig að liðin keppa í fjögurra liða riðlum um eitt laust sæti í næstu umferð.

Valur mætir Hayasa frá Armeníu. Pomurje Beltinci frá Slóveníu og Shelbourne frá Írlandi eru einnig í riðlinum og mætast í hinum undanúrslitaleiknum. Sigurvegarnir mætast svo í úrslitaleik um sæti í annari umferð á sunnudag.

Breiðablik mætir Rosenborg. Sigurvegarinn úr leiknum mætir Minsk frá Hvíta-Rússlandi eða Slovacko frá Tékklandi á sunnudag.

Blikar tóku þátt í riðlakeppni Meistaradeildarinnar á síðustu leiktíð.

Leikur Vals og Hayasa fer fram í Slóveníu, sem og allir leikir þess riðils, og hefst hann klukkan 9 í fyrramálið. Breiðablik og Rosenborg mætast klukkan 16 í Þrándheimi í Noregi. Sá riðill fer fram þar í landi.