Willian, fyrrum leikmaður Chelsea og Arsenal, hefur yfirgefið lið Corinthians í heimalandi sínu Brasilíu.

Þetta hefur leikmaðurinn staðfest en hann gekk í raðir Corinthians síðasta sumar eftir mörg ár á Englandi.

Hann ákvað hins vegar að rifta samningi sínum við Corinthians eftir að hafa fengið morðhótanir.

Willian segir sjálfur frá þessu en fjölskyldu leikmannsins var einnig hótað og er hann á leið aftur til Evrópu.

,,Ég kom ekki til Brasilíu til að vera hótað. Þegar Corinthians tapaði og ég var ekki að spila vel þá fékk fjölskylda mín morðhótanir,“ sagði Willian.

,,Eiginkona mín, dætur mínar og það leið ekki langur tími þar til þeir byrjuðu svo að ráðast að föður mínum og systur.“

Corinthians samþykkti að rifta samningi Willian sem er 34 ára gamall í dag.