Það andar mögulega köldu á milli Heimis Guðjónssonar og Ólafs Jóhannessonar eftir að sá síðarnefndi tók við liði Vals fyrr í sumar.

Fjallað er um málið í hlaðvarpsþætti Dr. Football en Heimir var nýlega rekinn frá Val eftir nokkuð slæmt gengi og Óli Jó ráðinn inn á nýjan leik.

Fyrrum þjálfarinn Arnar Daði Arnarsson ræddi við X-ið síðustu helgi þar sem hann sagði frá köldum kveðjum frá Heimi að núverandi þjálfara Vals, Óla Jó.

Þetta mál var tekið fyrir í Dr. Football fyrir helgi og ræddi Albert Brynjar Ingason stöðuna í samtali við Hjörvar Hafliðason sem er umsjónarmaður þáttarins.

Heimir hefði mögulega fengið meiri tíma til að laga stöðu Vals ef Óli Jó hefði ekki verið klár í að taka við keflinu en hann var einnig fyrr í sumar rekinn frá FH þar sem gengið var slakt.

,,Maður veit ekkert fyrir víst hvað Heimir er að hugsa en það vita það flestir að Valur var að pota í Heimi Hallgríms og svona þegar gekk illa og það gekk ekki svo þeir héldu sig við Heimi. Ég held að Heimir sé ósáttur við það að ef Óli Jó hefði ekki verið klár í að taka þetta hefði hann fengið meiri tíma,“ sagði Albert.

,,Þeir láta hann ábyggilega fara því Óli Jó er tilbúinn að koma inn og hjálpa þeim út tímabilið og þá opnast glugginn í að láta Heimi fara. Ég held að hann sé ósáttur við það að hann hafi opnað þann möguleika fyrir Val að taka hann.“

,,Ég er ekki að segja að hann eigi rétt á að vera fúll yfir þessu en þetta er það sem mér dettur í hug.“