Stjarnan tapaði óvænt, 0-3, gegn Leikni Reykjavík í Bestu deild karla í gær.

Málefni liðsins voru til umræðu í hlaðvarpsþættinum Þungavigtinni í gærkvöldi.

„Þeir eiga að vera með þessa ungu gæja og spila skemmtilegan fótbolta. En þetta var ekki boðlegt í kvöld,“ segir Kristján Óli Sigurðsson, sérfræðingur þáttarins.

Stjarnan hefur komið mörgum á óvart í sumar og spilað virkilega skemmtilegan fótbotla á köflum. Það hefur þó vantað stöðugleika. Liðið er í fjórða sæti deildarinnar með 20 stig.

„Stjarnan getur alveg daðrað við neðri hlutann ef ekki verður gripið inn í. Þú getur ekki farið að veðja á Stjörnuleiki og haldið að þú sért að fara að græða eitthvað,“ segir Kristján.

Óskar Örn Hauksson kom til Stjörnunnar frá KR fyrir tímabilið. Hann hefur þó ekki spilað eins stórt hlutverk og margir bjuggust við. Óskar kom inn á sem varamaður á 83. mínútu í leiknum í gær.

„Helvíti skemmtileg skilaboð sem hann er að fá þarna, geitin sjálf,“ segir Kristján Óli Sigurðsson.