Arnar Gunnlaugsson, þjálfari Víkings, hefur tjáð sig um rauða spjald Kristals Mána Ingasonar í kvöld gegn Malmö.

Kristall fékk að líta tvö gul spjöld í 3-2 tapi gegn Malmö og það seinna fyrir að ‘sussa’ á stuðningsmenn sænska liðsins.

Kristall bjóst sjálfur ekki við því að fá rautt spjald en Arnar telur að dómurinn hafi verið réttur.

Hann ræddi við Expressen eftir lokaflautið í kvöld.

,,Ég tel að þetta hafi verið rautt, já. Það er leiðinlegt að hann hafi yfirgefið völlinn því hann er mjög góður leikmaður,“ sagði Arnar.

,,Stuðningsmennirnir hefðu notið þess að horfa á hann í 90 mínútur en þetta var örugglega rétt rautt spjald.“

,,Nei ég er ekki reiður út í hann, hann er ungur leikmaður sem við fengum frá FCK fyrir tveimur árum. Viðhorfið sannar það bara að hann elskar íþróttina. Ég get aldrei orðið reiður út í hann, bara stoltur.“