Argentínska knattspyrnugoðsögnin Lionel Messi, leikmaður Paris Saint-Germain sneri aftur til Barcelona í sumarfrí með fjölskyldu sinni og fékk sannarlega góðar móttökur frá stuðningsmönnum Barcelona þegar komið var á flugvöllinn.
Messi er í guðatölu hjá stuðningsmönnum liðsins eftir tíma sinn hjá Barcelona þar sem hann vann allt sem hægt var að vinna. Hann gekk síðan til liðs við Paris Saint-Germain fyrir nýafstaðið tímabil og hleður nú batteríin fyrir komandi átök næsta tímabils.
Það er því varla til betri staður fyrir Messi til þess að slaka á en í Barcelona, umhverfi sem hann nýtur sín í og á góðar minningar frá.
Leikmaðurinn er af mörgum talinn besti knattspyrnumaður sögunnar en hann var hins vegar mikið gagnrýndur fyrir frammistöðu sína með Paris Saint-Germain á síðasta tímabili.
Alls spilaði hann 34 leiki fyrir PSG, skoraði 11 mörk og gaf 15 stoðsendingar. Tímabilið áður spilaði Messi 47 leiki fyrir Barcelona, skoraði 38 mörk og gaf 14 stoðsendingar.
Messi has arrived back in Barcelona sigh pic.twitter.com/o0ZwCRS8W8
— Goat (@Goatisgone) June 15, 2022
