Þórhallur Dan Jóhannsson, fyrrum knattspyrnumaður og þjálfari, segir að leikmenn íslenska karlalandsliðsins verði að vanda hvað þeir segja út á við vilji þeir fá fólkið í landinu á bakvið sig.

Þórhallur ræddi þetta í hlaðvarpsþættinum Mín skoðun í minntist á ummæli Jón Dags Þorsteinssonar sem sagði að landsliðið „hlustaði ekki á trúða úti í bæ.“

„Auðvitað er pirr­andi að ná ekki ein­um sigri. Það vantaði ekki mikið upp á hjá okk­ur. Við þurf­um að fá litlu atriðin með okk­ur í þessu. Það veit eng­inn hvort bolt­inn var inni eða ekki í dag og svo­leiðis hlut­ir mega fara að detta með okk­ur. Við get­um verið já­kvæðir. Þetta eru fyrstu þrír leik­irn­ir hjá okk­ur þar sem er kom­in rétt mynd á liðið eft­ir all­ar breyt­ing­arn­ar. Við horf­um fram á veg­inn, erum já­kvæðir og hlust­um ekki á þessa trúða út í bæ,“ sagði Jón Dagur við mbl.is eftir janftefli Íslands gegn Ísrael fyrr í vikunni.

„Leikmenn eru komnir í slag við fólkið í landinu. Það eru ekki bara fjölmiðlamenn sem eru að gagnrýna, en það er ekki verið að gagnrýna leikmenn heldur þjálfarann,“ sagði Þórhallur.

„Jón Dagur kallaði fólkið sem er að gagnrýna hann trúða. Það er bara þjóðin. Hvernig ætlið þið að fá fólk til að styðja ykkur ef þið kallið það trúða?“

„Menn verða að vanda sig þegar þeir fara í viðtöl,“ sagði Þórhallur að lokum.