Börkur Edvardsson formaður knattspyrnudeildar Vals hefur ekki viljað svara í símann frá því að farið var að ræða um þjálfaramál hjá meistaraflokki karla.

Börkur var staddur erlendis í síðustu viku þegar byrjað var að ræða um framtíð Heimis Guðjónssonar sem þjálfara liðsins.

Eftir að Börkur snéri aftur til landsins hefur hann ekki svarað ítrekuðum símtölum 433.is. Elvar Geir Magnússon ritstjóri Fótbolta.net hafði sömu sögu að segja í útvarpsþætti Fótbolta.net á X977 síðustu helgi.

Heimir Guðjónsson þjálfari liðsins hefur heldur ekki tekið upp tólið í að verða tvær vikur. Blaðamaður hefur ítrekað hringt í bæði Börk og Heimi til að ræða stöðu mála hjá Val, prófað hefur verið að hringja úr hinum ýmsu símanúmerum til að reyna að leita svara.

Valur hefur tapað fjórum leikjum í röð í deild og bikar og er liðið ellefu stigum á eftir toppliði Breiðabliks eftir átta umferðir.

Óvíst er hvers vegna Börkur og Heimir verjast frétta en framtíð þjálfarans er á milli tannana á fólki.