Kári Árnason og Rúrik Gíslason, fyrrum landsliðs- og atvinnumenn í knattspyrnu eru sérfræðingar Viaplay í kringum leiki Íslands í Þjóðadeild UEFA og þeir voru mættir í settið í kvöld fyrir leik Ísraels og Íslands.

Þar bar á góma frétt Fréttablaðsins frá því fyrr í vikunni þar sem greint var frá því að nokkrir leikmenn í núverandi landsliðshópi hafi frétt af því að þeir yrðu hluti af landsliðinu í yfirstandandi verkefnum með öðrum leiðum en frá KSÍ.

Kári og Rúrik voru spurðir að því í setti hvernig þessum málum hefði verið háttað þegar að þeir voru í landsliðinu.

,,Það vissu flestir hverjir voru í hópnum á þessum tíma,“ sagði Kári um tímann sem hann var í landsliðinu ,,en það voru 2-3 nöfn sem voru ekki vissir hvort þeir yrðu í landsliðshópnum en þeir voru alltaf látnir vita með samskiptum frá einhverjum innan KSÍ.“

Rúrik tók undir þetta hjá Kára. ,,Stutta svarið við þessu er já. Maður fékk alltaf símtal frá sambandinu. Ég velti því fyrir mér hvort að þetta sé áhugaleysi eða metnaðarleysi sem veldur því að leikmenn frétta af valinu frá vinum og vandamönnum.“

,,Ég velti því hvað velur að leikmenn fái ekki að vita af landsliðsvali frá þjálfara eða KSÍ. Þetta er ekki nógu fagmannlegt.“